Banku BRI hamutuk ho ANATL hala'o Lansamentu ba kartaun BRIZZI iha Aeroportu Internasional Prezidente Nicolau Lobatu

DILI, 25 jullu 2024 (BRI Media) - BRI Timor-Leste hamutuk ho Aviation Navigation Administration Timor-Leste (ANATL) ohin ofisialmente lansa kartaun BRIZZI, ne’ebé ho objetivu atu fornese servisu pagamentu ne’ebé efisiente liu iha Aeroportu Internasionál Prezidente Nicolau Lobato (AIPNL).

Lansamentu ne’e lidera husi Jerente Jerál BRI Timor-Leste, Roby Firmansyah Sastraadmadja, hamutuk ho Prezidente ANATL, Romualdo da Silva, Adjuntu BCTL (Banku Sentrál Timor-Leste), Rafael Borges, Embaixadór Indonézia iha Timor- Leste, Okto Dorinus Manik, no Ministru Transporte no Komunikasaun Timor-Leste, Miguel Marques Manetelu. Eventu ne’e hala’o iha salaun VIP AIPNL iha Kinta-Feira.

Iha ninia diskursu, Jerente Jerál BRI Timor-Leste, Roby Firmansyah Sastraadmadja, haktuir katak BRIZZI nu’udar osan eletróniku ne’ebé hasai hosi Banku BRI, ne’ebé dezeña atu fasilita tranzasaun ho seguru, lalais no efisiente, no hamenus dependénsia ba osan-kas. Nia hatutan, "Kolaborasaun ida ne'e, liu-liu iha AIPNL, sei sai nu'udar pasu dahuluk hodi introduz utilizasaun osan eletróniku iha Timor-Leste. Ami fiar, ida ne'e sei la'ós de'it hasa'e efisiénsia operasionál iha aeroportu, maibé mós enkoraja adosaun ba tranzasaun dijitál sira iha rai laran."

Prezidente ANATL, Romualdo da Silva, mós fó benvindu ba lansamentu BRIZZI ne’ebé hein katak sei garante liu tan servisu tranzasaun ne’ebé prátiku, seguru no efisiente ba vizitante sira iha aeroportu, liu-liu bainhira uza estasionamentu. “Hahú ohin, ami sei hala’o pagamentu ho kartaun BRIZZI sei uza ofisialmente iha loron 1 fulan Agostu”, tenik Romualdo.

Embaixadór Indonézia iha Timor-Leste, Okto Dorinus Manik, fiar katak kolaborasaun ne’e nu’udar inovasaun pagamentu ne’ebé sei hametin dijitalizasaun sistema pagamentu iha Timor-Leste, nune’e mós sai ezemplu ba dezenvolve sistema pagamentu iha setór emprezariál sira seluk iha nasaun ida ne’e .

Ministru Transporte no Komunikasaun, Miguel Marques Manetelu, subliña kompromisu governu Timor-Leste nian hodi apoia konetividade servisu bazeia ba dijitál, inklui governu eletróniku, komérsiu eletróniku, pagamentu dijitál no ekonomia dijitál. “Pasu ida ne’e importante atu prepara Timor-Leste sai membru permanente ba ASEAN no WTO,” dehan Ministru Miguel.

Hafoin lansamentu, konvidadu sira haree demonstrasaun kona-ba uza kartaun BRIZZI iha área estasionamentu AIPNL nian. Kartaun BRIZZI rasik sai hanesan solusaun pagamentu la'ós osan ne'ebé popular iha Indonézia dezde introdús hosi Banku BRI iha tinan 2017, uza hodi selu transporte públiku, pedájen, estasionamentu, no mós iha komersiante oioin.